२०८१ आश्विन १७ गते, बिहीबार
२०८१ आश्विन १७ गते, बिहीबार
काठमाडौं । निरन्तर वर्षाका कारण हेटौँडा–काठमाडौँ जोड्ने दुई वटा सडक अवरुद्ध भएको छ । माथिबाट खसेको लेदोका कारण सिस्नेरी–कुलेखानी–फर्फिङ–काठमाडौं सडक र कान्ति लोकपथ सडकखण्ड अवरुद्ध भएको हो ।
सोमवार तीन बजेर ५० मिनेटको समयमा मकवानपुरको इन्द्रसरोबर गाउँपालिका –३ रामचन्द्र भञ्ज्याङस्थित सिस्नेरी कुलेखानी फर्फिङ काठमाडौं सडकखण्डमा बर्षाका कारण लेदो खसेर बाटो अवरोध भएको जिल्ला प्रहरी कार्यालय मकवानपुरका प्रहरी नायब उपरीक्षक लक्ष्मी भण्डारीले जानकारी दिईन् ।
प्रहरी चौकी सिस्नेरीबाट खटिएको टोलीसहित सडक डिभिजन कार्यालयसँग समन्वय गरी जेसिभिले बाटो पन्छाउने कार्य भइरहेको उनले जानकारी दिए । त्यस्तै, आज दिउँसो तीन बजेर २० मिनेटको समयमा मकवानपुरको भिमफेदी गाउँपालिका–८ महादेवटारस्थित हेटौँडा–काठमाडौँ जोड्ने कान्ति लोकपथ सडकखण्डमा वर्षाका कारण लेदो खसेर बाटोमा अवरोध भएको छ ।
जिल्ला प्रहरी कार्यालय मकवानपुरका अनुसार इलाका प्रहरी कार्यालय ठिंगन र सडक विभाग तथा फास्टट्रयाकसँग समन्वय गरी पहिरो पन्छाउने काम भइरहेको छ ।
