काठमाडौँ । कोशी प्रदेशका मुख्यमन्त्री उद्धव थापाले कोशी प्रदेशको सरकार अत्यन्तै सङ्कटपूर्ण अवस्थामा चलिरहेको बताउँदै यसको निकासका लागि प्रदेशका सबै दल मिल्नुको विकल्प नरहेको बताएका छन् ।

शनिबार झापाको कनकाई नगरपालिकास्थित कनकाई बहुमुखी क्याम्पसमा आयोजित क्याम्पसको १४ औँ क्याम्पस सभालाई सम्बोधन गर्दै मुख्यमन्त्री थापाले प्रदेश सरकार अङ्क गणितीय हिसाबलेसमेत सङ्कटपूर्ण अवस्थामा रहेको भन्दै सरकारको स्थायित्वका लागि सङ्घर्ष गरिरहेको भन्दै प्रदेश सरकार राजनीतिक समस्या र आर्थिक तरलताका बिचमा रहेकोले कोशी प्रदेश सरकार अन्य प्रदेश सरकार भन्दा पछाडि परिसकेकोले प्रदेशसभा प्रतिनिधित्व गर्ने सबै दललाई समस्या समाधानका लागि गम्भीर भएर लाग्नसमेत आग्रह गरेका छन् ।

देशको राजनीतिक सङ्कटलाई बुझेर कोशी प्रदेशमा प्रतिनिधित्व गर्ने सबै दल एकआपसमा सहकार्य र एकता विना समस्याको निकास ननिस्कने भन्दै सहकार्यका लागि सबैसँग मुख्यमन्त्रीले आग्रह गरेका छन् । पूर्व मुख्यमन्त्रीले समेत समस्या समाधानका लागि सर्वदलीय सरकारको आह्वान गरेको सम्झना गरे ।

सरकारले सर्वदलीय र सहमतीय सरकारका लागि आह्वान गरिएको बताए । यसका लागि प्रदेशमा रहेका सबै दलका नेता र सांसदले गम्भीर भएर लागि दिन मुख्यमन्त्री थापाले आग्रह गरेका छन् ।

कोशी प्रदेशमा अध्यादेशबाट बजेट आएर सदन अनिश्चित कालका लागि बन्द भएको भन्दै वर्तमान सरकार यो गतिरोध हटाउनका लागि लागिपरेको बताएका छन् । यसका लागि सहमतिकै आधारमा सांसदको गतिरोध हटाउन र बजेटलाई अगाडि बढाउन समेत सरकार लागिपरिरहेको बताएका छन् ।

कोशी प्रदेशमा हाल कसैको पनि बहुमत नपुग्ने र अहिलेको गठबन्धन सरकारको पक्षमा बहुमत पुगे पनि यस झिनो बहुमतले सरकारको स्थायित्व र विकासका लागि यो पर्याप्त भने नहुने भन्दै थापाले सहमतीय सरकारको आवश्यकता रहको बताएका छन् ।

कार्यक्रममा कोशी प्रदेश सभाका सदस्य लख्खीकुमारी गणेश, कनकाई नगरपालिकाका प्रमुख राजेन्द्रकुमार पोखरेल, उपप्रमुख आशा शर्मा सिवाकोटी, कनकाई बहुमुखी क्याम्पसका अध्यक्ष प्रकाश चुडाल लगायताले मन्तव्य राखेका थिए ।