काठमाडौँ । काठमाडौँ महानगरपालिकाले मिनभवन स्थित सडक डिभिजन काठमाण्डौंको गेटमा अगाडि फोहोर फालिदिएको प्रति सडक डिभिजन काठमाण्डौंले आपत्ति जनाएको छ।

कार्यालयले शनिबार साँझ एक विज्ञप्ति जारी गर्दै काठमाडौं महानगरको यो बलमिच्याई तथा अराजक शैली भएको बताएको छ।

‘मिनि टिप्परबाट कार्यालय परिसर छिर्न समेत अवरोध हुनेगरी फोहोर फालिएको विषयले सडक डिभिजन काठमाण्डौंको गम्भीर ध्यानाकर्षण भएको छ। काठमाण्डौं जिल्ला भित्रका सडक निर्माण तथा मर्मत संभारको महत्त्वपूर्ण जिम्मेवारी पाएको यस सडक डिभिजनको गेटमा देशकै ठूलो तथा जिम्मेवार स्थानीय सरकारबाट कानुनी राज्यको उपहास हुने गरी बलमिच्याई तथा अराजक शैलीबाट भएको यस किसिमको व्यवहारले महानगरको गरिमा कदापि नबढ्ने विषय छर्लङ्ग छ।’ सडक डिभिजनले विज्ञप्ति मार्फत भनेको छ।

सडक डिभिजनका सूचना अधिकारी प्रमोद खतिवडाले शुक्रबार काठमाण्डौं महानगरपालिकाका मेयर बालेन साह र डिभिजनका डिभिजन प्रमुख बिच महानगर भित्रका सडक सुधारका विविध विषयमा छलफल समेत भएको जानकारी दिए। उनले नियम बमोजिम सहकार्य गरेर अगाडि जाने विषयमा छलफल भएको सुनाए।

यस अघि महानगरपालिकाबाट नियमबमोजिम यस डिभिजनमा सडक काट्न माग भई आएका सबै अनुमति समेत दिइएको उनको भनाइ छ।

विज्ञप्तिमा अझ प्रस्ट पार्दै भनिएको छ ‘शनिबार करिब १२ बजे न्यूरोड क्षेत्रमा यस डिभिजनको जिम्मामा रहेको सडकमा विना अनुमति सडक काटी सडकको चौडाई घटाउने कार्यमा महानगरपालिका लागेको बखत बिना अनुमति सडक काटेर साँघुरो बनाउन नहुने भनी सडक डिभिजनबाट सो कार्यमा रोक लगाइएको विषयलाई विषयान्तर गरी डिभिजनसँग सरोकार नभएको विषयलाई कारण बनाई गरिएको यस किसिमको व्यवहारले कानुनी राज्यको उपहास गरेको ठम्याई यस सडक डिभिजनको रहेको छ।’ उसले भनेको छ।

सडक डिभिजन काठमाण्डौंको कार्य क्षेत्र भित्र भएका त्रुटि औँल्याइ आवश्यक सुझाव दिए डिभिजन सकारात्मक सुझाव सम्झेर कार्यान्वयन बताउँदै उनले डिभिजनको कार्यक्षेत्रसँग सरोकार नभएको विषय उठाई भएका अराजक व्यवहार आगामी दिनमा सह्य नहुने र सो को प्रतिकार गर्न समेत सडक डिभिजन बाध्य हुने बताए।

काठमाडौं महानगरपालिका प्रमुख बालेन्द्र साह ९बालेन० ले विगत १५ वर्षदेखि चक्रपथ विस्तार अन्तर्गतको दोस्रो खण्ड ९कलंकी( बसुन्धरा० विस्तारको नाममा काठमाडौंका जनताले धुलो र कष्ट बेहोर्नु परेको भन्दै शनिबार सडक विभाग र सडक डिभिजन काठमाडौं अगाडि एक(एक ट्रक धुलो खन्याएका थिए।

मन्त्रालयको कमजोरीका कारण काठमाडौं महानगरले गाली खान परेको बताउँदै उनले यथाशीघ्र काम अगाडि बढाउन चेतावनी दिएका थिए।

उनले सामाजिक सञ्जाल मार्फत भनेका थिए ‘यो धुलो जनताले मात्र खाँदा राम्रो देखिँदैन। जबसम्म तपाईँ काम अगाडि बढाउनु हुन्न, हरेक दिन तपाईँलाई पायक पर्ने ठाउँमा एक ट्रक धुलो उपहार पठाउने छु, माया सम्झेर स्विकार्नु होला।’

सोही कुराको खण्डन गर्दै सडक डिभिजन काठमाण्डौंले विज्ञप्ति जारी गरेको हो।